Stutt til jóla

Það nálgast óðfluga að nýtt tímabil hefjist, eins og flestir sjá það, með 1. umferð ensku úrvalsdeildarinnar. Það er spenna í lofti og menn eru uppteknir við að spá í spilin. Ég mun vissulega ekki láta mitt eftir liggja og mun henda inn formlegri spá í tíma fyrir fyrstu leiki. Jafnframt mun ég enn einu sinni ýta úr vör Tippdeild og verður notast við gamalt og siglt afbrigði leiksins sem spilað var fyrir nokkrum árum við miklar vinsældir. Áhugasamir geta sett sig í samband við vefstjóra og fengið frekari upplýsingar, hafi þeir áhuga á að vera með. Í þessum pikkuðu orðum er útlit fyrir góða þátttöku.

Ég hlakka auðvitað til að herlegheit úrvalsdeildarinnar fylli sjónvarpsskjáinn, ekki síst þar sem mínir menn í Norwich City eru mættir til leiks að nýju í hópi þeirra bestu. Hins vegar er tímabilið að verða mánaðar gamalt hjá mér persónulega og mínir heimamenn í Aberdeen FC haldið mér við efnið og eru að fara að spila sinn 5. leik í forkeppni Evrópudeildarinnar á fimmtudaginn.
Tvennir andstæðingar hafa verið lagðir og nú er það FC Kairat Almaty frá Kazakhstan sem næstir eru í röðinni. Þetta er sýnd veiði en ekki gefin og þarna er á ferðinni eitt af þessum Austur-Evrópsku liðum sem dúkkað hefur upp á síðustu árum eftir að hafa verið fóstrað af fjársterkum aðilum heima fyrir. Við ættum samt alveg að eiga raunhæfan möguleika en þetta stendur væntanlega og fellur með niðurstöðunni úr útileiknum á fimmtudaginn.

Eins og venjulega á þessum árstíma horfi ég stíft til þess hvað er að gerast í undirbúningi minna liða og hingað til er þetta búin að vera vonbrigði og óttalega ergilegt. Frekar lítið að gerast  á tvennum vígstöðvum af þremur.
Á Carrow er ekkert frágengið nema kaupin á Mulumbu frá WBA. Hann kemur á „free“ og verður eflaust góð viðbót í hópinn. Yfirlýst markmið var að lágmarki 4 – 5 nýjir leikmenn inn miðað við þær forsendur að við héldum lykilmönnum.
Mögulega eru kaupin á Írska landsliðsmanninum Robbie Brady loksins að ganga í gegn á næstu klukkutímum og væri það uppörvandi.
En, mér sýnist þó liggja fyrir nú þegar að ef landa á viðbótar mannskap þá er hann ekki að fara að setja mark sitt á liðið í fyrstu umferðum mótsins og allt eins líklegt að menn verði að eltast við að bæta mönnum við allt til loka gluggans. Þetta er, að mínum dómi, alls ekki nægilega góð frammistaða.
Engar stærri sölur hafa átt sér stað hvað sem síðar verður og það er auðvitað bara hið besta mál.

Mínir menn í La Liga og þeirra stjóri, „minn“ maður David Moyes marg gaf það í skyn að hann væri líklegur til að styrkja sitt lið fyrir komandi vertíð og þá jafnvel með leikmönnum úr úrvalsdeildinni. Enn sem komið er bólar ekkert á slíku og einungis spurst af honum í biðröðum eftir hinum eða þessum úrvalsdeildarleikmönnum.
Moyes hefur þó ekki setið auðum höndum alfarið og seinast í gær keypti hann 26 ára sóknarmann, brassan Jonathas de Jesús sem spilaði með Elche á síðasta tímabili og skoraði  þar 14 mörk í 34 leikjum. Áður var hann búinn að landa Portúgalska sóknarmanninum Bruma á lánssamningi frá Galatasary og Mexíkóanum sterka Diego Reyes frá Porto, sömuleiðis á lánssamningi. Þetta gæti því verið að skríða saman hjá Moyes-aranum.

Helstu vonbrigðin eru brotthvarf Alfreðs Finnbogasonar frá félaginu til Grikklands. En satt best að segja kemur það ekki stórkostlega á óvart þar sem hann náði aldrei að fóta sig á Anoeta á síðasta tímabili.

Hér hjá mínum heimamönnum í Aberdeen juða menn hægt og hljótt við að byggja undir. Rétt eins og stuðningsmönnum var sagt þá er ekkert að gerast hratt eða í stórum stökkum en augljóst að menn vinna að því einarðlega að koma félaginu aftur á kortið með öllum þeim ráðum sem í boði eru miðað við aðstæður og fjárhagslega burði.
McInnes hefur styrkt hópinn og gæti átt eftir að bæta enn frekar í hann ekki síst ef svo atvikast að frekari Evrópu-bolti verði á boðstólum þegar líður á haustið.

Það er því bara gaman að vera til í boltheimum og kristaltært að mín lið eru öll á uppleið….eða er það ekki annars?